6 «А» сыныбында «Қарттарым – асыл қазынам» тақырыбында ашық тәрбие сағаты өтті. Сабақ мақсаты: ата-бабадан қалған ұлағатты ғибрат аларлық сөздерді балаларға ұғындыру арқылы оларды ізгілікке, сүйіспеншілікке,
адамгершілікке, қайырымдылыққа тәрбиелеу. Оқушыларды адалдықпен өмір сүрудің маңыздылығын ұғындыру арқылы құндылығының мәнін ашу. Іс-шара өту кезінде сынып бөлмесі талапқа сай безендіріліп, қарттар жайлы нақыл сөздер жазылып, арнайы слайд дайындалды. Іс-шараны сынып жетекші кіріспе сөзбен бастады. Одан соң
оқушыларға әдептілік, үлкенге құрмет, кішіге ізет көрсету жайлы бірнеше сұрақтар берілді. Сұрақтарға оқушылар жан-жақтан таласа жауап берді. Адамгершілік, инабаттылық, сыпайылық, ізеттілік жайлы әңгіме өрбітті. Іс-шараға
он шақты ата-әже қатысып, өздері жайлы қызықты мәліметтермен бөлісті. Өздерінің балалық шақтарына біраз сапар шегіп қайтты. Немерелері қойған сұрақтарға тағлымы мол жауап қайтарды. Оқушылар бірнеше тәрбиелік маңызы зор көріністер қойды. Ата-әжелеріне арнап мәнерлеп өлең де оқыды, ойларын плакатқа түсіріп, бәйтерек бейнесін салып, ақ тілектерін жазды. Іс-шара барысы әнмен әрленіп, күймен көмкеріліп отырды. Сол жерде оқушыларға ата-әжелеріңе арналған «Қарғыс алма, алғыс ал» дегендей қарттарға сый-құрмет көрсетіп, әрдайым көмек қолдарын созу керектігі әр оқушының, әр адамның парызы екені түсіндірілді. Сабақ соңында ата-әжелер оқушыларға, іс-шараны ұйымдастырушыларға ризашылықтарын білдіріп, «баталы ер арымас» дегендей ақ баталарын берді.